|
富明尼斯有地利高一線
02/07/2008
文： 亨格比利
邊廂歐國盃已經告一段落，但富明尼斯同利加大學仲要為南美洲區最高榮譽而戰！利加大學上星期贏富明尼斯四比二，依家差一步就可以歷史性首度成為自由盃盟主，不過聽朝去到馬拉簡拿球場冇「高原氣候」呢個好幫手，主場出擊特醒富明尼斯隨時有機可乘，呢場自由盃決賽次回合必撐「讓球主勝」！（有線61周四早上8:50直播）
利加作客麻麻
南美球隊特色係主客場分野大，利加主場位於海拔二千八百米之上，唔少勁旅去到佢地頭都腳仔軟。同樣利加客場成績亦非常麻麻，至今自由盃踢六場作客賽事只錄得一勝二和三負，就算殺到入決賽，但客場表現真係冇乜說服力。
富明尼斯巴甲聯賽包艇，皆因全隊上下擺晒全副心機落自由盃度，今場關鍵之戰肯定搏盡！由於自由盃決賽係唔計作客入球，可預期富明尼斯聽朝會展開強攻，目標係淨贏利加三球。係就係難，之不過呢支巴西隊伍今屆自由盃主場賽事贏晒，六仗轟入十六球僅失兩球。最重要係富明尼斯八強同四強都係處於劣勢情況下，後來居上將聖保羅同小保加淘汰，後勁凌厲成咁，今仗絕對值得秤高一線！
|
