29/06/2008
文： 法比嘉輝
歷時三星期歐國盃決賽周，終於來到終極一戰，由三屆盟主德國迎戰1964年冠軍西班牙！論表現，西班牙無論分組賽抑或淘汰賽都遠勝德國，決賽場合都要讓平半，並唔出奇。但實際上，佔優應該係德國至真，嘉輝綜合各《東方波經》名家意見後，決定推介德國下盤及半場和。（now 632、無翡翠台周一凌晨2時45分直播）
被睇低打高一皮
由分組賽開始，西班牙可說鋒芒畢露，球隊攻守兼備，贏盡掌聲，搞到決賽讓波，非常棹忌。其實掌聲背後，一定會為球隊帶來壓力，情況就好似葡萄牙對德國一樣，當大部分人睇高如日方中葡軍，睇低被一沉百踩德國時，偏偏葡萄牙就發揮唔出水準，反而德國寧做underdog、扮豬食老虎，結果發揮理想。所以，謹記被睇低德國隊，先係最可怕！
西班牙鋒力受損
今場西班牙有射手韋拿因傷缺席，當然對德國有利。連老帥阿拉干利斯都知道，費蘭度托利斯根本唔適應單箭頭打法，所以分組賽前先臨急臨忙打番442陣式，但效果卻出奇地好。縱然「王子」少波入，但其功勞卻大得很，所以韋拿因傷要打番451陣式，點都冇run順陣式咁好，而德國亦可以專心「炮製」費蘭度托利斯，更有效去減低其殺傷力。此外，德國亦決賽前較西班牙抖多一日，千祈咪睇小呢一日，炎熱奧地利作賽，體力會成為重要決勝因素。
德國大賽經驗豐
雖然大賽經驗似乎有點虛無，但事實上亦係重要一環。遠無謂講，德國近兩屆世界盃分別打入決賽及四強，而今屆歐國盃亦同樣入決賽，足證日耳曼軍團打大賽係有一手；而佢經驗，例如點樣應付決賽、點樣控制決賽情緒等，都會幫到手。相反西班牙近年多數早早出局，始終冇乜感受大戰氣氛，單睇佢今屆對意大利八強戰時，對「名牌」係有多少怯怯，亦發揮唔到強攻本色，所以德國受讓係幾抵玩。
高空力量決勝負
至於最關鍵因素，就係德國高空力量！決賽環境，兩軍大多唔想輸情況下，自然踢成膠狀態。呢個時候，死球就係一路奇兵，德國坐擁波歷克及高路斯等高空霸主，面對歐國盃平均身高最矮西班牙非常有利。雖然唔係話西班牙輸梗高波，但至少佢會驚，兩閘沙治奧拉莫斯及卡迪維拿亦會不時移入中路，自然大大削弱助攻能力。綜合各點，受讓德國始終較可取。
温馨小贴士：直接搜索“901”可以快速找到本站，查看更多更准更新的足球分析推介。
